इन्द्रेणी
१५ मंसिर २०७८, बुधबार १३:०२ राष्ट्रिय प्रजातन्त्र पार्टीको एकता महाधिवेशन काठमाडौंमा आजबाट सुरु भएको छ।
हिन्दू राज्य र राजसंस्थाको पक्षमा रहेको राप्रपाको महाधिवेशनको बुधबार दिउँसो राजधानीको भृकुटीमण्डपमा उद्घाटन गरिएको हो।
महाधिवेशनको तीन अध्यक्ष पशुपति शमशेर जबरा, कमल थापा र डा. प्रकाशचन्द्र लोहनीले तीनवटा पानसमा बत्ती बालेर उद्घाटन गरेका हुन ।
महाधिवेशनमा देशका विभित्र राजनीतिक दलहरूका नेता पनि अतिथिका रुपमा सहभागी रहेका छन्। यो महाधिवेशनमा राप्रपाका ४ हजारभन्दा बढी महाधिवेशन प्रतिनिधिबाट सहभागी भएका छन्।
राप्रपाको यो महाधिवेशनमा वर्तमान अध्यक्ष कमल थापा र नेता राजेन्द्र लिङ्देन नयाँ अध्यक्षका लागि चुनावी मैदानमा छन्।
एकता महाधिवेशनबाट नेतृत्व लिन खोजेका थापालाई पशुपतिशमशेर जबरा, लोकेन्द्रबहादुर चन्दलगायतले साथ दिने भएका छन्।
लिङ्देनलाई डा. प्रकाशचन्द्र लोहनी र धवलशमशेर राणा जस्ता वरिष्ठ नेताहरूले साथ दिएका छन्। दुई अध्यक्षबीच कडा प्रतिस्पर्धा हुने भएको हो ।