इन्द्रेणी
१५ मंसिर २०७८, बुधबार १४:२८ नेपाल क्लियरिङ हाउसले मंसिर ७ गते बाट लागू हुनेगरी कनेक्ट आईपीएस प्रणालीले कारोबार शुल्क घटाएको छ । नयाँ कारोबार शुल्क अनुसार अब बैंक तथा वित्तिय संस्था र भुक्तानी सेवा प्रदायकहरुका ग्राहकले जति पनि कारोबार अधिकतम ८ रुपैयाँमा गर्न सक्ने भएका छन् ।
अर्थात् कम्पनीले यसअघि कायम फन्ड ट्रान्सफर शुल्क घटाउँदै न्यूनतम २ रुपैयाँदेखि अधिकतम ८ रुपैयाँ कायम गरेको हो ।
परिवर्तित शुल्कअनुसार अब कम्पनीले ५०० सयसम्मको भुक्तानीमा प्रति कारोबार २ रुपैयाँले शुल्क लिनेछ भने ५०० भन्दा माथि ५,००० सम्म प्रति कारोबार ४ रुपैयाँ र सो भन्दा माथि जति पनि भूक्तानी कारोबारमा जम्मा ८ रुपैयाँ शुल्क लिने जनाएको छ ।
यसले ग्राहकहरुलाई एनसीएचएलका कनेक्ट आईपीएस वेब रमोबाइल एप, बैंक र वित्तिय संस्थाका मोबाइल र इन्टरनेट बैंकिङ्ग वालेटमा फण्ड लोड र विड्र लगायतका विभिन्न भुक्तानी गर्न थप सहज हुने विश्वास गरिएको छ ।
कनेक्ट आईपीएसबाट सरकारी राजस्व भुक्तानीमा भने पहिले नै प्रति कारोबार शुल्क २ देखि ५ रुपैयाँ कायम रहेको छ ।
नेपाल राष्ट्र बैंकको मार्गनिर्देशन बमोजिम डिजिटल भुक्तानीको थप प्रवद्र्धनका निम्ती एनसीएचएलले समय–समयमा यथोचित रुपमा कारोबार शुल्क परिवर्तन गर्ने गरेको छ । हालै नेपाल राष्ट्र बैंकबाट बैंक र वित्तिय संस्थाको मोबाइल बैंकिङ्गमा कारोबार शुल्क १० देखि अधिकतम ३० रुपैयाँसम्म तोकिएको थियो ।
चालु आर्थिक वर्षको पहिलो चार महिनामा नै कनेक्ट आईपिएसमा कारोबार संख्या तथा कारोबार रकमको आधारमा २२५ प्रतिशत वृद्धी भएको छ त्यसै गरी सो प्रणालीमा हाल दैनिक औसत कारोबार संख्या १ लाख १७ हजार १२ तथा रकमको आधारमा दैनिक औसत ८.३ अर्ब बराबरको रहेको छ ।