इन्द्रेणी
१७ मंसिर २०७८, शुक्रबार ०९:२३ नेपाली काँग्रेस बागमती प्रदेशको प्रथम अधिवेशन अन्तर्गत आज मनोनयन दर्ता हुँदैछ । काँग्रेसको १४ औं महाधिवेशन अन्तर्गत हेटौंडामा बिहीबारबाट सुरु भएको अधिवेशनमा आज शुक्रबार मनोनयन दर्ताको कार्यतालिका रहेको छ ।
मनोनयन दर्ताका लागि बिहान ८ बजेदेखि दिउँसो १ बजेसम्मको समय तोकिएको छ । सो समय भित्र प्रदेश समितिका विभिन्न पदका आकांक्षीहरूले मनोनयन पत्र भरेर दर्ता गरिसक्नुपर्ने प्रदेश निर्वाचन समितिले जनाएको छ ।
उम्मेदवारी दर्ता सम्पन्न भए पश्चात उम्मेदवार माथि दावी विरोधको समय भने दिउँसो १ बजेदेखि २ बजेसम्म तोकिएको छ । दावी विरोध परेका उपर दिउँसो ३ बजेसम्ममा निर्वाचन समितिले निर्णय दिइसक्ने जनाइएको छ ।
निर्वाचन कार्यतालिका अनुसार दिउँसो ३ बजेदेखि ४ बजेसम्म उम्मेदवारको नेपाली वर्णानुक्रम अनुसार प्रारम्भिक नामावली प्रकाशित गर्ने प्रदेश निर्वाचन समिति संयोजक वरिष्ठ अधिवक्ता केशव प्रसाद काफ्लेले जानकारी दिए ।
उनका अनुसार उम्मेदवारी फिर्ता लिने समय भने साँझ ४ बजेदेखि ५ बजेसम्म तोकिएको छ । साँझ ६ बजे उम्मेदवारको अन्तिम नामावली सार्वजनिक गरिने उनले बताए ।
बिहिबार अधिवेशन उद्घाटन कार्यक्रम सम्पन्न भएपछि साँझ मतदाता नामावली सार्वजनिक गरिएको थियो ।
निर्वाचन अन्तर्गत भोलि मंसिर १८ गते बिहान ९ बजेदेखि मतदान हुनेछ । प्रदेश प्रतिनिधिको रुपमा चुनिएर आएका करिब २ हजार १ सयभन्दा बढीले प्रदेश समिति निर्वाचनमा मतदान गर्नेछन् ।
अधिवेशनबाट प्रदेश सभापति १ जना, उपसभापति २ जना, महामन्त्री २ जना, सहमहामन्त्री ३ जना र ८३ जना सदस्यसहित ९१ जनाको प्रदेश समिति चयन गरिनेछ ।