इन्द्रेणी
१२ पुष २०७८, सोमबार १३:३५ सरकारले विदेश जानेहरूलाई कोरोनाविरुद्धको जोन्सन एण्ड जोन्सन खोप दिन सुरु गरेको छ । काठमाडौं उपत्यकाका ४ वटा अस्पतालबाट जोन्सन एण्ड जोन्सन खोप दिन सुरु गरिएको स्वास्थ्य मन्त्रालयले जनाएको छ । जोन्सन एण्ड जोन्सन खोप एक मात्रा लगाएपछि पूर्ण हुने मन्त्रालयले जनाएको छ ।
उपत्यकामा वीरेन्द्र सैनिक अस्पताल छाउनी, नेपाल प्रहरी अस्पताल महाराजगञ्ज, सशस्त्र प्रहरी अस्पताल बलम्बु र शहीद शुक्रराज ट्रपिकल तथा सरुवा रोग अस्पताल टेकुबाट जोन्सन एण्ड जोन्सन खोप दिइरहेको मन्त्रालयका सहप्रवक्ता डा. मीरकुमार अधिकारीले जानकारी दिएका छन् ।
खोप लगाउन जाँदा अनिवार्य रुपमा आफ्नो पासपोर्ट र भिसा लिएर जानुपर्ने अधिकारीको भनाई छ । नेपालमा खोप प्रयाप्त मात्रामा आयात भएपनि खोप लगाउनेको संख्या कम भएका कारण भण्डारणमा समेत समस्या हुन थालेको छ । सरकारी स्तरबाट खोपको दिलाउन उचित पहल नहुँदा लक्षित उमेर समूहका धेरै नागरिक अझैपनि खोप सेवाबाट बञ्चित छन् ।