इन्द्रेणी
१६ पुष २०७८, शुक्रबार ०८:२२ काठमाडौं, पुष १६। सहिद स्मारक ‘ए’ डिभिजन लिग फुटबल अन्तर्गत आज शुक्रबारबाट सातौं चरणका खेलहरु सुरु हुँदैछ ।लिगको सातौं चरण अन्तर्गत शुक्रबार त्रिपुरेश्वरस्थित दशरथ रंगशालामा सुरुआती दुई खेलहरु हुनेछन् । पहिलो खेलमा दुई विभागीय टोली सशत्र प्रहरीको एपीएफ क्लब र त्रिभुवन आर्मी क्लबबीच प्रतिस्पर्धा हुनेछ । एपीएफ र आर्मीबीचको विभागीय डर्बी खेल दिउँसो १ बजे सुरु हुनेछ ।
एपीएफ ६ खेलमा ५ अंक जोडेर ११ औं स्थानमा रहेको छ । एपीएफलाई रेलिगेसनको डर अझै रहेको छ ।त्यसैले आर्मीलाई हराउँदै एपीएफ अंक तालिका सुधार गर्न चाहन्छ । तर, बलियो आर्मीविरुद्ध एपीएफलाई जित निकाल्न कठिन हुनेछ ।यता, आर्मी जित निकाल्दै उपाधि होड कायम राख्न चाहन्छ । एएफसी कप छनोटको दौडबाट बाहिरिसकेको आर्मी उपाधि होड भने कायम राख्न चाहन्छ ।
आर्मी ६ खेलमा १० अंक जोडेर चौंथो स्थानमा रहेको छ । एपीएफलाई हराउन सकेमा आर्मी शीर्ष तीन भित्र उक्लने छ।यस्तै दोस्रो खेलमा फ्रेन्ड्स क्लब र न्युरोड टिम एनआरटीबीच खेल हुनेछ । फ्रेन्ड्स र एनआरटीबीचको खेल ४:४५ बजे सुरु हुनेछ ।फ्रेन्ड्स ६ खेलमा ३ अंक जोडेर पुछारमा रहेको छ । फ्रेन्ड्स जारी लिगमा जित निकाल्न नसक्ने एक्लो टिम हो । तर, आज एनआरटीलाई हराएर फ्रेन्ड्स पहिलो जित निकाल्न चाहन्छ ।
एनआरटी ६ खेलमा ७ अंक जोडेर आठौं स्थानमा रहेको छ । फ्रेन्ड्सलाई हराएर एनआरटी अंक तालिका सुधार गर्ने योजनासहित मैदान प्रवेश गर्नेछ । लिगमा १४ टोलीले प्रतिस्पर्धा गरिरहेका छन् । पुछारका दुई टोली रेलिगेसनमा पर्नेछ।