इन्द्रेणी
९ बैशाख २०७९, शुक्रबार १६:२६ प्रदेश १ का १ हजार ८ सय ७७ मतदान स्थलको सुरक्षाका लागि जनशक्ति परिचालनको काम अन्तिम चरणमा पुगेको निर्वाचन आयोगले जनाएको छ । प्रदेश निर्वाचन आयोग विराटनगरका प्रमुख लेवन काश्यप अधिकारीका अनुसार प्रदेश १ मा ३३ लाख ४७ हजार ३ सय ८४ जना मतदाता रहेका छन् । जसका लागि ४ हजार ५१ वटा मतदान केन्द्र स्थापना हुनेछन् ।
विराटनगरमा शुक्रबार सम्वाद समूहद्वारा आयोजित कार्यक्रममा अधिकारीसहित मोरङका मुख्य निर्वाचन अधिकृत भरत लम्साल, मोरङका प्रमुख जिल्ला अधिकारी काशीराज दाहाललगायतले निर्वाचन तयारीबारे जानकारी दिए । उनीहरुका अनुसार प्रदेशका कतिपय स्थानमा नेपाली सेनाले गस्ती पनि सुरु गरिसकेको छ । यस्तै अपुग भएका जनपथ प्रहरीको व्यवस्थापनका लागि केन्द्र तथा प्रदेश प्रहरी कार्यालयले समन्वय गरिरहेका छन् ।
आचारसंहिता पालना गर्ने गराउने, मतदान केन्द्रको अवस्थाबारे जानकारी लिने, मतदान केन्द्रमा खटिने कर्मचारीलाई नियुक्ति दिने, आवश्यक सामग्रीहरुको बाँडफाँट र व्यवस्थापन गर्ने काम पनि अहिले धमाधम भइरहेको छ ।