इन्द्रेणी
१८ असार २०७९, शनिबार ०९:५० काठमाडौं, असार १८। बैङ्ककबाट काठमाडौं आएका एक यात्रुले बोकेको सुटकेसको ह्याण्डिलभित्र सुन भेटिएको छ। शुक्रबार बेलुका नेपाल एयरलाइन्समार्फत बैङ्ककबाट काठमाडौं आएका रोकेश तुलाधरले बोकेको सुटकेसबाट २६७.४ ग्राम सुन त्रिभुवन विमानस्थल भन्सार कार्यालयले नियन्त्रणमा लिएको हो। भन्सार अधिकृतले चेकजाँच गर्ने क्रममा सुटकेश उचाल्न प्रयोग हुने ह्याण्डिल साईडको भित्रपट्टि शंकास्पद धातु रहेको पाएपश्चात खोल्दा भित्री भागमा सुन भेटिएको हो। करिब ५ ईन्च लम्बाई र १ ईन्च चौडाईको सुनको बारलाई कार्बन पेपरले र्यापिङ गरी अड्काएर ल्याएको थियो।
शुक्रबार राती नै उनलाई नेपाल प्रहरीको हिरासतमा राखेर भन्सार कार्यालयले विस्तृत अनुसन्धान प्रारम्भ गरेको छ। सुनको अवैध आयातमा रोकेश तुलाधर एक्लै संलग्न थिए वा अरू व्यक्तिको पनि संलग्नता थियो भन्ने विषय भने थप अनुसन्धान भइरहेको प्रहरीले जनाएको छ। अनुसन्धानका लागि भन्सार अधिकृतलाई २५ दिनको समय उपलब्ध हुने प्रावधान छ।