इन्द्रेणी
२ भाद्र २०७९, बिहीबार १०:२५ काठमाडौं, भदौ २। रौतहटमा सवारी दुर्घटना हुँदा ३ जनाको मृत्यु भएको छ । पूर्व–पश्चिम राजमार्ग अन्तर्गत जिल्लाको चन्द्रपुर नगरपालिका–२ पूर्वी लच्का नजिकै बिहान करिब साढे ४ बजेतिर अटो र बस एक आपसमा ठक्कर खाँदा उनीहरुको मृत्यु भएको हो । काठमाडौंबाट सर्लाहीतर्फ जाँदै गरेको वाग्मती प्रदेश ०३–००१ ख २०१ नम्बरको बस र पूर्वबाट पश्चिमतर्फ आउँदै गरेको प्रदेश २–०२–००१ ह २१०९ नम्बरको अटो ठक्कर खाएर दुर्घटना भएको जिल्ला ट्राफिक प्रहरी कार्यालय रौतहटले जनाएको छ ।
प्रहरीका अनुसार मृत्यु हुनेहरुमा अटोमा सवार सर्लाही जिल्लाको सोल्टी बस्ने ढकबहादुर लुंगेली मगर, प्रेम ठाडा मगर र अटो चालक रवि मगर रहेका छन् । दुर्घटनामा घाइते भएकी ढकबहादुरकी श्रीमती सबिना लुंगेली मंगरको भने स्थानीय चन्द्रपुर अस्पतालमा उपचार भइरहेको छ । अस्पतालका अनुसार उनको दुवै खुट्टामा चोट लागेको छ । ठक्कर दिने बस र बस चालक नियन्त्रणमा लिएर दुर्घटनाबारे अनुसन्धान सुरु गरेको जिल्ला ट्राफिक प्रहरी कार्यालय रौतहटकी प्रमुख प्रहरी निरीक्षक विमला कुमारी कठायतले जानकारी दिइन्।