इन्द्रेणी
२० श्रावण २०७९, शुक्रबार १५:१४ काठमाडौं, साउन २०। परराष्ट्र मन्त्रालयले अमेरिकी स्टेट पाटर्नसीप प्रोग्राम (एसपीपी) रद्ध गरिएको पत्र अमेरिकालाई पठाइएको प्रति कुनै शंका नगर्न आग्रह गरेको छ । मन्त्रालयले पत्र पठाइएको बारे परराष्ट्रमन्त्री डा. नारायण खड्का स्वयंले संसद्मा जानकारी गराइसकेको विषय भएकाले यस बारेमा कुनै शंका नगर्न आग्रह गरेको हो ।
शुक्रबार भएको नियमित पत्रकार सम्मेलनमा मन्त्रालयकी प्रवक्ता सेवा लम्सालले कुटनीतिक पत्र एक तर्फीरूपले सार्वजनिक गर्न नहुने बताइन् । संसदीय समितिमा अमेरिकालाई पठाइएको पत्र सार्वजनिक हुनुपर्ने बहस चलिरहेको बेला प्रवक्ता लम्सालले अन्तर्राष्ट्रिय कुटनीतिक मामिलाका विषयमा एकपक्षीय ढंगले पत्रहरू सार्वजनिक गर्न नमिल्ने दाबी गरिन् ।
बिहीबार संसदीय समितिले सरकारले एसपीपी रद्ध गरेको भनिएको अमेरिकी सरकारलाई पठाएको पत्रको प्रतिलिपीसहित उपस्थित हुन सरकारलाई निर्देशन दिएको थियो। संसदको राज्यका निर्देशक सिद्धान्त नीति र दायित्वको कार्यान्वयन अनुगमन तथा मुल्यांकन समितिले परराष्ट्रमन्त्री नारायण खड्का, कार्यवाहक प्रधानसेनापति, रक्षा सचिवलाई उपस्थित हुन निर्देशन दिएको हो।