इन्द्रेणी
२८ भाद्र २०७९, मंगलवार १२:०८ राष्ट्रिय सभाका अध्यक्ष गणेशप्रसाद तिमिल्सिना र नेपाल भ्रमणमा रहेका चीनका राष्ट्रिय जनकंग्रेसका अध्यक्ष ली चान्सुबीच भेटवार्ता भएको छ ।नयाँ बानेश्वरस्थित प्रतिनिधि सभा भवनमा आज तिमिल्सिना र चान्सुबीच भेटवार्ता भएको हो ।
उनीहरूबीच संसदीय प्रतिनिधिमण्डलस्तरीय द्विपक्षीय भेटवार्ता भएको सङ्घीय संसद् सचिवालयले जनाएको छ । सोमबार नेपाल आएका चान्सुले सोही दिन प्रतिनिधि सभाका सभामुख अग्निप्रसाद सापकोटासँग भेटवार्ता गरेका थिए ।
चार दिने नेपाल भ्रमणमा आएका चान्सुले यहाँ रहँदा उच्चस्तरीय भेटवार्ता गर्ने कार्यसूची रहेको छ । सोही अनुसार आज अपराह्न प्रधानमन्त्री शेरबहादुर देउवालाई पनि भेट्ने कार्यक्रम तय भएको छ । त्यसअघि पूर्वप्रधानमन्त्रीद्वय केपी शर्मा ओली र प्रचण्डलाई भेट्ने कार्यसूची छ ।
सभामुख सापकोटाको निमन्त्रणामा नेपाल आएका चान्सु बिहीबार फर्किनेछन् । चान्सुको निर्वाचनको पूर्व सन्ध्यामा नेपाल भ्रमण गर्नुलाई राजनाीतिक महत्वका साथ हेरिएको छ ।