इन्द्रेणी
२५ आश्विन २०७९, मंगलवार १०:२१ युक्रेनको राजधानी किभमा रुसले गरेको मिसाइल आक्रमणको विश्वका धेरै देशले निन्दा गरेका छन्। रुसले विश्वविद्यालय र बालबालिकाको खेल मैदान लगायतका नागरिकलाई निशाना बनाएको अमेरिकाले बताएको छ। अमेरिकाले युक्रेनलाई सहयोग जारी राख्ने आश्वासन दिएको छ।
संयुक्त राष्ट्रसंघका महासचिव एन्टोनियो गुटेरेसले आक्रमणबाट आफू अत्यन्तै स्तब्ध भएको बताएका छन्। रुसी राष्ट्रपति भ्लादिमिर पुटिनले क्रिमियालाई रुससँग जोड्ने एकमात्र पुलमा शनिबार भएको विस्फोटको प्रतिक्रियामा आक्रमण भएको बताएका छन्।
रुसले सोमबार ८३ वटा क्षेप्यास्त्र प्रहार गरेको र जसमध्ये ४३ वटा हवाई प्रतिरक्षा प्रणालीले निष्क्रिय पारेको युक्रेनले दाबी गरेको छ। युक्रेनका राष्ट्रपति भोलोडिमिर जेलेन्स्कीले एक भिडियो सार्वजनिक गर्दै भनेका छन्, ‘युक्रेनलाई डराउन सकिँदैन। यी सबै कुराले उसलाई थप एकताबद्ध बनाउनेछ।
‘रसियाले युद्ध अपराध गर्यो’
राजधानी किभ बाहेक रुसले युक्रेनको लभिभ, खार्किभ, डिनिप्रो, जापोरिज्ज्यामा पनि आक्रमण गरेको थियो। यी शहरहरू विगतमा पनि रुसको निशानामा थिए र पछिल्ला महिनाहरूमा यहाँ धेरै विनाश भएको छ। एक अधिकारीले सोमबारका यी आक्रमणमा झण्डै १४ जनाको ज्यान गएको र कैयौं घाइते भएको बताएका छन्।
आक्रमणका कारण धेरै सहरमा बिजुली र पानी आपूर्ति अवरुद्ध भएको छ। युरोपेली संघले रुसले युद्ध अपराध गरेको र आतंक र क्रुरता प्रदर्शन गरेको बताएको छ। अमेरिकी राष्ट्रपति जो बाइडेनलगायत विश्वका धेरै देशका नेताहरूले युक्रेनका राष्ट्रपतिसँग कुराकानी गरेका छन्। बाइडेनले यी आक्रमणहरूलाई अत्यन्त क्रुर रूपमा वर्णन गर्दै भने कि अमेरिकाले युक्रेनलाई मद्दत गर्न जारी राख्नेछ र उन्नत वायु रक्षा प्रणाली उपलब्ध गराउनेछ।
अर्कोतर्फ, रुसी राष्ट्रपति भ्लादिमिर पुटिनले आक्रमणहरू केर्च ब्रिजमा शनिबार भएको विस्फोटको प्रतिक्रिया भएको र आफू युक्रेनमा ‘भयानक’ आक्रमण गर्ने आदेश दिन लागेको बताएका छन्। त्यही समयमा, रुसी सुरक्षा परिषद्का उपप्रमुख दिमित्री मेट्वेदेवले भने, ‘यो आक्रमणको पहिलो एपिसोड मात्र हो। बाँकी एपिसोडहरु पनि आउनेछन्।’ (बीबीसी हिन्दीबाट)