इन्द्रेणी
२२ मंसिर २०७९, बिहीबार ०८:४१ महिला हिंसाविरुद्धको १६ दिने अभियान सञ्चालन भइरहँदा लैङ्गिक हिंसाका घटना थपिने क्रम जारी छ । महिला, बालबालिका तथा ज्येष्ठ नागरिक मन्त्रालयको आह्वानमा मङ्सिर २४ गतेसम्म अभियान सञ्चालन भइरहेको छ र यस अवधिमा ६ भन्दाबढि महिलाले अकालमा ज्यान गुमाएका छन्।
आइतबार काठमाडौँको धुम्बाराहीमा नुवाकोटकी २७ वर्षीया पुष्पा न्यौपाने जलेर गम्भीर घाइते हुनुभयो। उहाँको कीर्तिपुरस्थित वर्न अस्पतालमा उपचारका क्रममा मङ्गलबार मृत्यु भयो । मृतक पुष्पाको गत भदौ १८ गते युवक सुधन सङ्ग्रौलासँग जनैसुपारी सम्पन्न भएको थियो। विवाह गर्ने सहमतिपछि गरिएको जनैसुपारी वर पक्षले एकतर्फी रूपमा तोडेको बताएपछि भएको पुष्पाको मृत्यु रहस्यमय बनेको छ।
शनिबार वर पक्षले पुष्पाको घरमा पुगेर जनैसुपारी र दक्षिणा फिर्ता गर्दै मगनी तोडिएको घोषणा गरी वधू पक्षबाट उपहारस्वरूप पाएका सामान फिर्ता लिन आउन भनेको थियो। वर पक्षको घरमा पुगेकी पुष्पाको जलेर भएको मृत्युबारे जिल्ला प्रहरी परिसर काठमाडौँले युवक सुधनलाई नियन्त्रणमा लिई अनुसन्धान सुरु गरेको छ। यस्तै सुर्खेतको पञ्चपुरी नगरपालिका–३, तोक्माका ३८ वर्षीय अम्मर आलेमगरले मङ्गलबार दिउँसो धारिलो हतियार प्रयोग गरी ३० वर्षीया पत्नी मीना आलेको घाँटी रेटेर हत्या गरेका छन्। आरोपित आलेमगरलाई इलाका प्रहरी कार्यालय बाबियाचौरले नियन्त्रणमा लिई अनुसन्धान सुरु गरेको छ।
त्यस्तै सुनसरीको धरान उपमहानगरपालिका–१३ स्थित एकल महिला उषा राईको हत्या भएको छ। एक समूहले कुटपिट गरेर हत्या गरेको आरोपमा प्रहरीले चार जना महिलालाई पक्राउ गरी सार्वजनिकसमेत गरिसकेको छ।
कुटपिटबाट गम्भीर घाइते उषाको मङ्सिर १३ गते उपचारकै क्रममा मृत्यु भएको थियो। मृतकका भाइ सुन्दर राईको किटानी जाहेरीपछि धरानस्थित इलाका प्रहरी कार्यालयले ती महिलालाई पक्राउ गरेको र थप आरोपितको खोजी भइरहेको जनाएको छ। पक्राउ पर्नेमा मुख्य आरोपित धरान–१३, सूर्यमार्ग बस्ने ५५ वर्षीया उर्मिला राई रहेकी छिन्। उर्मिलाले आफ्ना पति गोविन्द राईसँग उषा नजिकिएको भन्दै महिलाको समूह बटुलेर गत कात्तिक ३ गते कुटपिट गरेको आरोप लागेको छ। उनलाई मङ्सिर १५ गते पक्राउ गरी अनुसन्धान गरिरहेको जनाएको छ । कुटपिटपछि घाइते भएकी उषाको बीपी कोइराला स्वास्थ्य विज्ञान प्रतिष्ठानमा उपचारका क्रममा मृत्यु भएको थियो। प्रहरीले सोही वडा बस्ने २६ वर्षीया सुमित्रा राई, धरान–१७ बस्ने २९ वर्षीया सुसेली राई र ४० वर्षीया रत्न लिम्बूलाई पक्राउ गरी अनुसन्धान सुरु गरेको छ। उषाका पतिको मृत्युपछि सिलाइबुनाइ तथा बाख्रापालन गरी दुई छोरीसहित जीविकोपार्जन गर्दै आउनुभएको थियो।
प्रहरीले उक्त घटना भएको बेला खिचिएको भिडियोमा देखिएका महिलाको पनि खोजी र अनुसन्धान भइरहेको जनाएको छ। उक्त घटनामा सिर्जना राई, मीना राई र नीरकुमारी गुरुङको पनि संलग्नता रहेको भन्दै जाहेरी परेकाले उनीहरूको खोजी भइरहेको प्रहरीले जनाएको छ।
समाजसास्त्री डा. टीकाराम गौतमले सङ्क्रमणबाट गुज्रिरहेको नेपाली समाजमा विकृति र विसङ्गति मौलाउँदै जाँदा असंवेदनशीलता तथा अराजकता बढेको बताउनुभयो। उहाँले लैङ्गिक हिंसाविरुद्धको अभियानका क्रममा भएका पछिल्ला घटनाले समाजमा संवेदनहीनता मौलाउने खतरा देखाएको बताउनुभयो।
नेपाल प्रहरीका पूर्वनायब महानिरीक्षक हेमन्त मल्लले पछिल्लो समय महिलामाथि भइरहेका हिंसा डरलाग्दो रहेको बताउनुभयो। उहाँले आफ्नै घरअगाडि जलिरहेकी युवतीको उद्धार नगरी मुकदर्शक बन्ने तथा आफ्नै श्रीमतीको क्रुर हत्याका घटनाले समाज असंवेदनशील र गैरजिम्मेवार बन्दै गएको बताउनुभयो।
यता सुदुरपश्चिममा एक किशोरीको हत्या, सुर्खेतमा श्रीमती घाटी रेटि हत्या जस्ता घट्नाले सरकारी अभियान र सुरक्षा चुनौतिलाई थप जटिल बनाएको छ ।