भारतले बिहान ५ बजे बाँध खोलेको हो। बाँध खोलेसँगै महाकाली नदीमा आएको बाढीले भारततर्फ नदी किनाराको एक घर बगाएको छ। बाढीले दार्चुलापारि भारततर्फको धारचुलाको बस्तीसमेत कटान गर्न थालेका छ। महाकाली नदीमा पानीको बहाव बढ्न थालेपछि नेपालतर्फको बैतडी र दार्चुलाका बस्तीमा समेत क्षति पुग्ने सम्भावना छ। भारततर्फ नदीले जमिन कटान गर्न थालेको छ।

जिल्ला प्रहरी कार्यालय दार्चुलाका प्रमुख ९डिएसपी० तर्कराज पाण्डेयले महाकाली नदीको कटानले भारततर्फ एक घर बगाएको जानकारी दिनुभएको छ। नेपालतर्फ भने कुनै क्षति भएको छैन तर पनि नदी किनाराका बस्तीमा उच्च सतर्कता अपनाइएको भनाइ उहाँको छ।

महाकाली नदीमा पानीको सतह र बहाव बढेकाले जिल्ला प्रशासन कार्यालय बैतडी र दार्चुलाले नदी तटीय क्षेत्रका बासिन्दालाई सजग र सतर्क रहन आग्रह गरेको छ। बाँधका ढोका राति ८ बजेसम्म खोलिने जनाइएको छ। जिल्ला प्रशासन कार्यालय बैतडीले महाकाली नदी किनारका बासिन्दालाई उच्च सतर्कता अपनाउन आग्रहसहित सार्वजनिक सूचना जारी गरेको छ।

बाढीले जमिन कटान तथा अन्य क्षति हुने सम्भावना भएकाले नदी छेउछाउ नजान तटीय क्षेत्रका स्थानीयलाई आग्रह गरिएको प्रमुख जिल्ला अधिकारी सुरेश पन्थीले बताउनुभयो।

राति ८ बजेसम्म बाँधको ढोका खुला रहने र त्यसपछि पनि नदीमा पानीको सतह बढ्ने भएकाले सतर्कता अपनाउन तथा नदी वारपार नगर्न आग्रह गरिएको उहाँले बताउनुभयो। दार्चुलादेखि बैतडी, डडेलधुरा, कञ्चनपुर भएर भारततिर बग्ने महाकाली नदीले सर्वसाधारणलाई दुःख दिने गरेको छ।

भारत सरकारले सिल्ट सफाइको कामका लागि उक्त परियोजनाको बाँधका ढोका खोल्ने जानकारी यसअघि गराएको थियो। धौलीगङ्गा जलविद्युत् परियोजनाको बाँध बर्खाका बेला हरेक वर्ष खोल्ने गरिएको छ।

विसं २०७० असार २ र ३ गते एक्कासि धौलीगङ्गाको बाँध खोलेपछि दार्चुला सदरमुकामका सयभन्दा बढीले घर बगाएको थियो। यस पटक भने अगाडि नै सूचना दिएको जनाइएको छ। धौलीगङ्गा बाँध खोलेपछि दार्चुलामा प्रमुख जिल्ला अधिकारी किरण जोशीसहित सुरक्षा प्रमुखको टोलीले महाकाली नदी तटीय क्षेत्रको निरीक्षण गर्नुभएको छ।