इन्द्रेणी
२१ श्रावण २०८०, आईतवार १९:५३ महाकाली नदीमा पानीको सतहले सतर्कता विन्दु नाघेपछि नदीमाथि बनेको बनबासा पुलमा चार पाङ्ग्रे सवारी आवतजावत बन्द गरिएको छ ।
पुल जीर्ण भैसकेकाले महाकाली नदीमा पानीको बहाव एक लाख क्युसेकभन्दा माथि नाघेपछि बनबासा पुलमा सवारीसाधन आवतजावतमा बन्देज लगाउने गरिन्छ । शारदा ब्यारेजको बनबासा पुलमा चार पाङ्ग्रे सवारी आवतजावत बन्द भएपछि नेपाल–भारतमैत्री बस सेवा अन्तर्गत महेन्द्रनगरबाट हरिद्वार र दिल्ली चल्ने बसहरु यतिबेला पुलको वारी नै रोकिएका छन् ,
साना सवारीसाधन पनि पुल पारी र पुलको वारी नै रोकिएका छन । आज बिहान १० बजे देखि महाकाली नदीको जलस्तर बठ्न सुरु भएको हो । आज साँझ ४ बजेको मापनअनुसार महाकाली नदीमा पानीको बहाव १ लाख ६३ हजार ९ सय ५० क्युसेक पुगेको छ । अहिले पनि जलस्तर बढ्नेक्रममै रहेको यहाँका अधिकारीहरुको भनाइ छ ।
जल तथा मौसम विज्ञान विभागको बाढी पूर्वानुमान महाशाखाले डडेल्धुराको परिगाउँस्थित महाकाली नदीमा राखेको जल मापन प्रणालीका अनुसार नदीमा पानीको मात्रा सतर्कताको बिन्दु नाघेको छ । परिगाउँमा अहिले ५।८७ मिटर पानीको वहाव छ । सो ठाउँमा ५।८ मिटरको बहाव सतर्कताका बिन्दु मानिन्छ ।