इन्द्रेणी
२३ आश्विन २०८०, मंगलवार २०:०४ सर्लाहीमा घाँस काट्न जङ्गल गएका एक बालकको मङ्गलबार बिहान हात्तीको आक्रमणमा परेर मृत्यु भएको छ ।
जङ्गली हात्तीको आक्रमणबाट रामेछापको लिखु तामाकोशी गाउँपालिका वडा नं। २ घर भई हाल हरिवन नगरपालिका–७, स्थित फुपुको घरमा बस्दै आएका तोयानाथ दाहालका छोरा १४ वर्षीय शिव दाहालको मृत्यु भएको हो ।
बालकलाई गाउँ नजिकको हरिपुर नगरपालिका–१, जानकीनगरस्थित वनमा घाँस काट्न जाँदा जङ्गली हात्तीले आक्रमण गरेको स्थानीयले बताएका छन् ।
घटनास्थलमा पुग्नुभएका इलाका प्रहरी कार्यालय हरिपुरका प्रहरी निरीक्षक ठाकुर सापकोटाले हात्तीले कुल्चिएर क्षतविक्षत पारेको अवस्थामा बालकको शव फेला परेको बताउनुभयो । घाँस काट्दै गर्दा अकस्मात् हात्तीसँग भेट भएपछि बालक उप्किन पाएनन् ।
मृतक बालकको शव पोष्टमार्टमका लागि प्रादेशिक अस्पताल मलङ्गवामा राखिएको छ । वन कर्मचारीसहित घटनास्थलमा पुगेर प्रहरीले बालकको शव जङ्गल बाहिर निकालेको थियो ।
हात्तीको आक्रमणमा परेर बालकसँगै घाँस काट्न जानु भएका हरिवन नगरपालिका–१०, बस्ने ५१ वर्षीय छविलाल काफ्ले घाइते हुनुभएको छ । हात्तीले आक्रमण गर्नासाथ काफ्लेले भने भागेर ज्यान जोगाउन सफल हुनुभएको छ ।
दाखिने खुट्टा र शरीरका अन्य भागमा चोट लागेर घाइते हुनु भएका काफ्ले नमुना अस्पताल हरिवनमा उपचारपछि घर फर्किसक्नुभएको इलाका प्रहरी कार्यालय हरिवनका प्रहरी निरीक्षक अनिल गिरीले जानकारी दिनुभयो । उहाँका अनुसार काफ्ले खतरामुक्त हुनुहुन्छ ।
जङ्गलमा हात्ती पसेर एक बालकको ज्यान लिएपछि हरिवन, घुर्कौली, जानकीनगर, हजारबिघा, सखुवा, जुटपानीलगायत जानकीनगर साझेदारी वन आसपासका स्थानीय त्रसित बनेका छन् ।
हरिवन नगरपालिका ६ को वडा कार्यालयले मङ्गलबार सूचना जारी गरी वडा नं. ६ सँगै रहेको जानकीनगर साँझेदारी वनभित्र केही दिनदेखि जङ्गली हात्ती देखा परेकाले सचेत रहन भन्दै सूचना जारी गरेको छ ।
सर्लाहीका जङ्गल क्षेत्रमा बर्सेनि अन्य स्थानबाट आउने जङ्गली हात्तीले यसरी मानवीयसँग घर तथा अन्य भौतिक संरचना र बालीनालीमा क्षति गर्दै आइरहेको छ ।